Алматыда полицейлер көлігін автобус жолағына қоятындарды ойбайлатты

kolesa.kz

Төле би көшесінде сау ете қалған полицейлер он жүргізушіге айыппұл арқалатып жіберді, қалғандарын "кешіріп", қолдарына ескерту қағаз ұстатты.

Алматы полицейлеріне тыным жоқ. Бүгін олар Төле би көшесінің Масанчи мен Байтұрсынов қиылыстары арасындағы учаскесін тексеруге келіп, көлігін автобус жолағына қаңтаруды әдетке айналдырған жүргізушілердің көңіл-күйін құртып кетті, деп хабарлайды zakon.kz kolesa.kz-ке сілтеме жасап.

– Анықталғандай, ереже бұзатындардың дені – сол жердегі ауруханалардың клиенттерін таситын жүргізушілер екен. Сол себепті көпшілігіне тек ескерту түріндегі әкімшілік жаза қолданды, – деді Алматы ПД Жергілікті полиция қызметі патруль полициясының полк командирі Манап Саттаров.

Оның сөзінше, көліктерін автобус жолағына қаңтарып кетіп, тексеру кезінде көлік жанынан табылмаған он жүргізушіге кәдімгі ақшалай айыппұл салынды. Олардың көліктері айып тұрағына аттанды.