"Bek Air" компаниясының артында кім тұр?

ЖШС құрылтайшылары мен қатысушылары оның үлестес тұлғалары болып табылады.

Әділет министрлігінің баспасөз қызметіне "BEK AIR" ЖШС-нің құрылтайшылары жөнінде көптеген бұқаралық ақпарат құралдарының сұраныстары келіп түсті, деп хабарлайды zakon.kz.

"Жауапкершілігі шектеулі және қосымша жауапкершілігі бар серіктестіктер туралы" Заңына сәйкес жауапкершілігі шектеулі серіктестіктің үлестес тұлғалары туралы мәліметтер қызметтік, коммерциялық немесе заңмен қорғалатын өзге де құпияны құрайтын ақпарат болып табылмайды.

Бұл ретте, ЖШС-нің құрылтайшылары мен қатысушылары оның үлестес тұлғалары болып табылады.

Бизнес-сәйкестендіру нөмірлері Ұлттық тізілімінің мәліметтеріне сәйкес "BEK AIR" ЖШС-і 2011 жылдың 12 мамырында тіркелген. Басшысы Монахов Владимир Михайлович, құрылтайшысы Жаркимбаев Сәкен Тоқпайұлы болып табылған.

2017 жылдың 18 сәуірінде құрылтайшы – Дамир Маратұлы Шүленбаевтың ауысуына байланысты қайта тіркеуден өтті.

Үш рет басшының ауысуы тіркелді: 2013 жылғы 29 тамыз – Жұмасұлтанова Айгүл Файзуллақызы, 2016 жылғы 18 шілде – Жұмасұлтанова Дина Нұрланқызы, 2019 жылғы 25 сәуір – Бияхметов Рустам Ілиясұлы.