Медицина саласының бірқатар қызметкері жемқорлық үшін айыпталуда
zakon.kz
Қаңтар айында еліміздің бірқатар өңірлерінде Сыбайлас жемқорлыққа қарсы қызмет медицина қызметкерлеріне қатысты жемқорлық жасады деген күдік бойынша сотқа дейінгі тергеулерді бастады, деп хабарлайды zakon.kz.
Шымкент қаласында Түркістан облысы Қоғамдық денсаулық басқармасының "Облыстық балалар ауруханасы" ШЖҚ МКК бұрынғы бас дәрігері 20 млн теңгеден астам бюджет қаражатын жымқырды деп күдіктенуде. Шенеунік ғимаратты жөндеу бойынша орындалмаған жұмыстарға ақы төлеп қаражатты ысырап еткен.
Қостанай облысында облыс әкімдігі Денсаулық сақтау басқармасының "Арқалық қаласының мамандандырылған сәбилер үйі" КММ бас дәрігерінің 2 млн теңгеден астам бюджет қаражатын ұрлауға қатыстылығы тексерілуде.
Маңғыстау облысында "Маңғыстау облыстық жедел және шұғыл медициналық жәрдем станциясы" ШЖҚ МКК басшысының м.а. қатысты бір азаматтан фельдшер болып жұмысқа орналасқаны үшін қомақты мөлшерде пара алды деген күдікпен тергеу басталды.
Қызылорда облысында көпсалалы облыстық аурухананың дәрігері азаматтарды "Облыстық білім басқармасы" ММ-нің лауазымды тұлғаларына мұғалім ретінде жұмысқа орналастырғаны үшін 600 мың теңге, "Жедел медициналық көмек" ММ-нің директорына фельдшер ретінде жұмысқа орналастырғаны үшін 500 мың теңге пара беруге итермелегені және келесі бір азаматты "Жер қатынастары басқармасы" ММ-не жұмысқа орналастыруға ықпалдасуы үшін алдау жолымен 600 мың теңге пара алды деп күдіктелуде.
Сотқа дейінгі тергеулер жалғасуда. Күдіктілердің кінәсінің дәрежесі бойынша түпкілікті шешімді сот шығарады.
