Тоқаев: Қазақстан әлеуметтік маңызы бар тауарлармен толықтай қамтамасыз етілген

Мемлекет басшысы Орталық Азия елдерімен өзара ниеттестік белгісі ретінде Қазақстан мұқтаж елдердің үкіметтері жәрдем сұраған жағдайда гуманитарлық көмек көрсетуге әзір екенін де атап өтті.

Қасым-Жомарт Тоқаев Нұр-Сұлтан қаласындағы көлік-логистикалық орталығында болып, Қазақстанның әлеуметтік маңызы бар тауарлармен толық қамтамасыз етілгенін мәлімдеді, деп хабарлайды zakon.kz.

"Continental Logistics" көлік-логистикалық орталығына барып, елорда мен өңірлерге азық-түлік жеткізу жұмыстарымен таныстым. Еліміз әлеуметтік маңызы бар тауарлармен толық қамтамасыз етілген. Жалпы сомасы 14,8 млрд теңге болатын мемлекеттік қор қалыптасуда. Үкімет және әкімдіктер тұрақтандыру қорларын толықтырып, азық-түлік бағасына мониторинг жүргізуі керек. ТЖ кезінде азық-түліктің жеткізілуіне ерекше көңіл бөлген жөн. Алыпсатарлық пен дүрбелеңге жол берілмейді. Әлеуметтік маңызы бар тауарлардың "шекті бағасы" сақталуға тиіс", деп жазды Президент Twitter-дегі парақшасында.

Сондай-ақ Мемлекет басшысы Орталық Азия елдерімен өзара ниеттестік белгісі ретінде Қазақстан мұқтаж елдердің үкіметтері жәрдем сұраған жағдайда гуманитарлық көмек көрсетуге әзір екенін де атап өтті.