Тоқаев Қазақстанның жетекші үш музейіне Ұлттық мәртебе берілетінін мәлімдеді

Тоқаев: Еліміздегі ең басты үш музейге ұлттық мәртебе беріледі, сурет - Zakon.kz жаңалық 21.05.2024 16:10

Сурет: akorda.kz

Мемлекет басшысы 21 мамырда еліміздегі ең басты үш музейге ұлттық мәртебе берілетінін мәлімдеді, деп хабарлайды Zakon.kz.

Оның айтуынша, қазіргі заманғы талаптарға сәйкес мұражай қоғамдық сананы жаңғыртуға ықпал ететін озық институтқа айналуы тиіс.

"Сол арқылы жас ұрпақ төл тарихымыз бен салт-дәстүрімізді терең танып, одан тағылым алуы қажет. Жалпы, елімізде тарихи-мәдени мұраны сақтау және молайту мақсатында ауқымды әрі үздіксіз жұмыс жүргізіліп келеді. Ұзақ жылдан бері алғаш рет жақында материалдық емес мәдени мұраның Ұлттық тізбесі айтарлықтай кеңейді. ЮНЕСКО-ның материалдық емес мәдени мұралар тізіміне біздің "салбурын" және "беташар" сияқты ұлттық дәстүрлерімізді енгізу мәселесі пысықталып жатыр", – деді Қасым-Жомарт Тоқаев.

Сондай-ақ, мемлекет басшысы мәдениет пен өнер адамдары тарихи үрдістің алдыңғы шебінде жүріп, сол арқылы ұлтымыздың қарқынды дамуына ықпал ететінін атап өтті.

"Сіздер өз шығармашылықтарыңыз арқылы халқымыздың бірегей болмысының жаңа қырын ашасыздар. Азаматтардың жасампаз қуатын оятасыздар. Сондықтан мемлекет шығармашылық өкілдерінің беделін арттыру үшін тиісті шараларды қабылдайды. Мәдениет және архив ісі қызметкерлерінің жалақысы айтарлықтай көбейді. Менің тапсырмаммен "Халық әртісі" және "Халық жазушысы" атағы қайта беріле бастады", – деді Президент.

Қасым-Жомарт Тоқаев халқымыз дарынды ұл-қыздарын қашанда қадірлей білгеніне назар аударып, Астанадағы Қазақ ұлттық өнер университетіне Күләш Байсейітованың есімін беру туралы шешім қабылдағанын жеткізді.

"Бұл – әйгілі әншіге көрсетілген зор құрмет әрі ерекше өнерімен тарихта қалған тұлғаларға ел ықыласының айрықша белгісі. Түптеп келгенде, мұны тарихи әділдікті қалпына келтіру деп түсінген жөн. Аға буынның өнердегі жолын қазіргі жастарымыз да лайықты жалғастырып келеді. Осы сабақтастықты сақтау өте маңызды", – деді Қасым-Жомарт Тоқаев.

Бұған дейін Қасым-Жомарт Тоқаев мәдениет және өнер қызметкерлерін марапаттау рәсіміне қатысты. Ол өнер – ұлттың жаны, ал мәдениет – рухани келбеті деп мәлімдеді.

Оқи отырыңыз