Тоқаев: Билікке жаңа буын өкілдері көптеп келе бастады
Сурет: akorda.kz
2024 жылғы 3 қазанда барлық деңгейдегі мәслихаттар депутаттарының екінші республикалық форумында сөйлеген сөзінде Қасым-Жомарт Тоқаев мәслихаттар мен әкімдіктер өзара үйлесімді жұмыс істеу керектігін атап өтті, деп хабарлайды Zakon.kz.
Президенттің сөзінше, реформаның арқасында еліміздегі әкімдер институты айтарлықтай өзгерді.
"Ауыл әкімін тікелей сайлау тәсіліне біржола көштік. Аз уақыттың ішінде ауыл әкімдерінің 90 пайызына жуығы жаңарды. Сондай-ақ аудан және облыстық маңызы бар қала әкімдерін сайлау жүйесін пилоттық жоба ретінде сынап көрдік. Биылғы Жолдауда айттым, олардың бәрі жаңа жылдан бастап сайланатын болады. Осылайша, басты билік тармақтары түгел сайлау жүйесіне көшті. Қазақстан тарихында ешқашан ондай тәжірибе болмаған. Тіпті, мұндай ауқымды реформа осы аймақта біздің елде ғана жасалып жатыр деуге толық негіз бар. Мұның бәрі – демократиялық даму жолындағы айрықша маңызды қадамдар." Президент
Елімізде халықтың жартысына жуығы ауылда, ауданда тұрады. Сондықтан азаматтардың көпшілігі үшін тікелей сайлау үйреншікті, қалыпты нәрсеге айналды, деп атап өтті мемлекет басшысы.
"Бұл жағдай жұрттың сайлау мәдениетін көтереді, саяси институттарды нығайтады. Жалпы, әкімдерді тікелей сайлау жүйесі елімізде жаңа саяси ахуалдың қалыптасуына жол ашты. Жергілікті атқарушы билікке жаңа буын өкілдері көптеп келе бастады. Кәсіпкерлердің, қоғамдағы белсенді азаматтардың, жастардың арасынан шыққан әкімдер аз емес. Қазір олар ел басқару ісін үйреніп, тәжірибе жинап жатыр. Жедел шешім қабылдап, жұмысты дер кезінде ұйымдастыруға бейімделіп келеді. Бұл қыста жылу-энергетика саласында күрделі жағдай болған кезде анық байқалды. Көктемдегі тасқын да кімнің қолынан іс келетінін нақты көрсетті. Шаруаға ширақ әрі елге жанашыр азаматтардың әкім болғаны дұрыс. Оларға жан-жақты қолдау көрсету керек. Әсіресе, мәслихат депутаттары мен әкімдердің бірлесе жұмыс істегені жөн. Өйткені оларды мемлекеттің жергілікті жердегі қос тірегі деуге болады". Қасым-Жомарт Тоқаев
Бүгін, 2024 жылдың 3 қазанында Астанада "Аманат" партиясының бастамасымен ұйымдастырылған барлық деңгейдегі мәслихаттар депутаттарының ІІ республикалық форумы өтуде.
2024 жылдың 29 маусымында "Аманат" партиясынан барлық деңгейдегі мәслихаттар депутаттарының бірінші республикалық форумы өтті. Оның жұмысына 3 мыңға жуық адам қатысты, оның 2,5 мыңы жергілікті өкілді органдардың Аманат депутаттары немесе елдегі барлық мәслихаттар депутаттарының 77 пайызға жуығы.
Жаңалықтан zakon.kz сайтында хабардар болыңыз:
Бөлісу
Если вы видите данное сообщение, значит возникли проблемы с работой системы комментариев. Возможно у вас отключен JavaScript
