Қазақстанның өз "алтын визасы" болады

2025 жылы 30 сәуірде ҚР Сыртқы істер министрлігі еліміздің жаңа инвесторлық виза енгізгенін мәлімдеді. Енді 300 мың АҚШ доллары көлемінде инвестиция жасаған шетелдіктер Қазақстанда 10 жылға дейін тұруға рұқсат ала алады, деп хабарлайды Zakon.kz.

Құзырлы ведомство бұл виза еліміздің инвестициялық тартымдылығын арттыруға және ұзақ мерзімді іскерлік серіктестікті қолдауға бағытталған.  

"Жаңа талаптарға сәйкес Қазақстан компанияларының жарғылық капиталына немесе отандық бағалы қағаздарға кемінде 300 000 АҚШ доллары көлемінде инвестиция салған шетел азаматтары инвесторлық визаны ресімдеу үшін электронды өтініш бере алады. Бұл "алтын виза" Қазақстанда 10 жылға дейін тұруға рұқсат алу мүмкіндігін көздейді", делінген хабарламада.

Мұндай визалық бағдарламалар халықаралық тәжірибеде (соның ішінде Еуропа елдері, АҚШ, БАӘ және Сингапурда) кеңінен қолданылып, капитал, технология мен іскерлік белсенділікті тартудың нәтижелі құралы ретінде өз тиімділігін дәлелдеді.

"Қазақстан осы тәжірибеге қосылып, инвестициялық резиденттіктің өзіндік моделін ұсынады. "Алтын визалар" шетелдік инвесторлар үшін қолайлы әрі болжамды орта қалыптастырып, заңды кепілдіктер беруге және елдің инвестициялық ахуалына сенімді нығайтуға бағытталған. Бұл жаңа бастама елдің ашықтыққа, капиталды қорғауға және тұрақты халықаралық экономикалық байланыстарды дамытуға бағытталған стратегиялық бағдарын көрсетеді", - дейді құзырлы ведомство.

Аталған құжат ресми жарияланғаннан кейін 10 күннен соң өз күшіне енеді.