Тасмағамбетовтың орнына ҰҚШҰ-ның жаңа бас хатшысы кім болатыны анықталды

2026 жылғы 1 қаңтардан бастап Ұжымдық қауіпсіздік туралы шарт ұйымының (ҰҚШҰ) жаңа бас хатшысы тағайындалады, деп хабарлайды Zakon.kz.

Ресей президентінің көмекшісі Юрий Ушаковтың брифингте айтуынша, Иманғали Тасмағамбетовтың орнына Қырғызстан өкілі Таалатбек Масадыков келеді.

"(27 қарашада Бішкекте өтетін Ұжымдық қауіпсіздік кеңесі сессиясына. – Ред.) ҰҚШҰ-ның бас хатшысы, Қазақстан өкілі Тасмағамбетов, әрине, қатысады. Ол 1 қаңтардан бастап бұл қызметтен кетеді. Оның орнына хатшылықты Қырғызстан өкілі, қазіргі уақытта ҰҚШҰ бас хатшысының орынбасары болып табылатын мырза Масадыков басқаратыны анықталды", – деп ТАСС Ушаковтың сөзін келтіреді.

Жоспар бойынша, Иманғали Тасмағамбетов саммитте "Халықаралық және өңірлік қауіпсіздіктің өзекті мәселелері және ҰҚШҰ-ның сессияаралық кезеңдегі негізгі жұмыстары жөнінде" баяндама жасайды.

Ушаковтың айтуынша, барлық рәсімдер аяқталғаннан кейін саммитте "қызметінен кетіп жатқан ҰҚШҰ бас хатшысы Тасмағамбетовты ҰҚШҰ-ның бірінші дәрежелі Құрмет белгісімен марапаттау рәсімі өтеді, бұл үшін тиісті шешім қабылданған".

Иманғали Тасмағамбетов 2023 жылғы 1 қаңтардан бері ҰҚШҰ-ның бас хатшысы қызметін атқарып келеді.

Айта кетейік, Бішкектегі ҰҚШҰ Ұжымдық қауіпсіздік кеңесінің отырысына Қазақстан Республикасының Президенті Қасым-Жомарт Тоқаевтың қатысуы жоспарланған.