"Тынығатын кез жетті". Рыбакина Miami Open финалынан кейін мәлімдеме жасады
Сурет: instagram.com/lenarybakina
"Бүгін қиын күн, екінші орын, бірақ мұндағы екі аптадан көптеген позитив алуға болады. Барлығына қолдағаны үшін рақмет. Демалатын және топырақты маусымға дайындалатын кез жетті", - деп жазды Елена Рыбакина Instagram-дағы парақшасында.
Еске салайық, бүгін, 2 сәуірде Қазақстанның бірінші, әлемнің 7-ракеткасы Елена Рыбакина Miami Open финалында жеңілді.
Елена Рыбакина финалда әлемнің 12-ракеткасы Петра Квитовамен ойнады. Қазақстандық теннисші 6:7(14), 2:6 есебімен жеңілді.
Майамидегі турнирдің финалында жеңіске жеткен чехиялық теннисші Петра Квитова Елена Рыбакинаны кейінгі бір жылда жеткен жетістігімен құттықтап, алдағы уақытта сәттілік тіледі.
Жеңілгеніне қарамастан, Елена Рыбакина Майамидегі турнирдің финалы үшін 650 рейтингтік ұпай мен 662 360 доллар сыйақы алады.
Ал Miami Open-2023 чемпионы Петра Квитова 1 000 рейтингтік ұпай мен 1 262 220 доллар жүлде алады.
Еске салайық, 14-15 сәуірде Елена Рыбакина Астанада қазақстандық команда сапында Билли Жан Кинг кубогында Польша құрамасына қарсы ойнайды.
