Қазақстандық мергендер Чехиядағы Гран-приде екі медаль жеңіп алды

Чехияның Пльзен қаласында нысана көздеуден Гран-при жарысында ел қоржынына 2 медаль түсті, деп хабарлайды Zakon.kz.

ҚР Туризм және спорт министрлігінің спортты дамыту дирекциясының баспасөз қызметі хабарлағандай, 10 метр қашықтықта жылжымалы нысанаға көздеуден командалық сында әйелдер арасында Зухра Ирназарова, Александра Садуақасова мен Фатима Ирназарова үштігі күміс жүлде иеленді.

Сурет: Instagram/qaz_team_official

Сондай-ақ дәл осы бағдарламада еліміздің ерлер құрамасы, Даниил Яковенко, Асадбек Назиркульев, Андрей Худяков қолаға қол жеткізді.

Әлемдік додаға 23 елден 550 спортшы қатысып жатыр.

Сурет: Instagram/qaz_team_official

Айта кетейік, бұл біздің мергендеріміздің алғашқы марапаттары емес. 3 мамырда оқ атудан Қазақстан құрамасының өкілдері Эльдар Иманқұлов пен Валерий Попелова Бакуде (Әзірбайжан) Әлем Кубогы кезеңінде екінші орын алды.