Путинцева жұптық сында Цинциннати турнирінің жартылай финалына өтті

Қазақстандық теннисші Юлия Путинцева жұптық сында Цинциннати (АҚШ) WTA 1000 турнирінің жартылай финалына шықты, деп хабарлайды Zakon.kz.

Қазақстандық теннисші канадалық Лейла Фернандеспен бірге ширек финалда жарыстың 1-ракеткалары, чехиялық Катерина Синякова – америкалық Тэйлор Таунсендпен кездесті.

Бірінші сетте чехиялық-америкалық жұп жеңіске жетті – 6:2.

Екіншісінде қазақстандық-канадалық дуэт есе қайырды – 6:1.

Супер тай-брейкте Путинцева – Фернандес жеңісті жұлып алды – 10:6.

Бір сағаттан астам уақытқа созылған бәсеке барысында екі жұп та 5 брейк-пойнттың екеуін пайдаланды.

Юлия Путинцева – Лейла Фернандес финалға шығу үшін чехиялық Линда Носкова – ресейлік Диана Шнайдермен таласады.

Еске салайық, Юлия Путинцева жекелей сында үшінші айналымда әлемнің 37-ракеткасы, испаниялық Паула Бадосаға 4:6, 4:6 есебімен жол беріп, ширек финалдан тыс қалды.