Әлеуметтік желідегі Байқоңырға қатысты ақпарат шындыққа жанаспайды - қала әкімшілігі

Әлеуметтік желі, сурет - Zakon.kz жаңалық 14.02.2023 21:34

Сурет: ғарыш айлағының баспасөз қызметі

"Байқоңыр қаласының тұрғындарына "Украинадағы соғысқа қатысқаны үшін" ақша ұсынып, үгіттеу жұмыстары жүргізіліп жатыр" деген ақпаратқа қатысты қала әкімшілігі түсінік берді, деп хабарлайды Zakon.kz.

"Қазіргі уақытта әлеуметтік желілерде Байқоңыр қаласының тұрғындарына "Украинадағы соғысқа қатысқаны үшін" ақша ұсынып, үгіттеу жұмыстары жүргізіліп жатыр" деген ақпарат шындыққа жанаспайды. Байқоңыр қаласы әкімшілігі басшысының 2023 жылғы 07 ақпандағы №49 қаулысына сәйкес, мобилизацияға тартылған Байқоңыр қаласындағы азаматтарға, сондай-ақ арнайы әскери операцияға қатысуға ниет білдірген және әскери қызметті өткеруге келісімшарт жасасқан адамдарға әлеуметтік қолдау шарасы ретінде 260 (екі жүз алпыс) мың рубль мөлшерінде біржолғы ақшалай төлем белгіленген". Байқоңыр қаласының әкімшілігі

Сондай-ақ Ресей Федерациясы Президентінің 2022 жылғы 21 қыркүйегіндегі №647 "Ресей Федерациясында ішінара мобилизация жариялау туралы" Жарлығына сәйкес, тек Ресей Федерациясының азаматтары әскери қызметке шақырылатыны да нақтыланады.

Сондай-ақ, ерікті түрде әскери қызметші ретінде мобилизацияға немесе арнайы әскери операцияға қатысу үшін Ресей Федерациясының 60 жасқа дейінгі ер азаматтары шақырылуы мүмкін.

Осылайша, Байқоңыр қаласы әкімшілігі басшысының жоғарыда аталған Қаулысына сәйкес, әлеуметтік қолдау шарасы ретінде 260 (екі жүз алпыс) мың рубль мөлшерінде біржолғы ақшалай төлем тек Байқоңыр қаласының тұрғыны болып табылатын Ресей Федерациясының азаматтарына қолданылады, делінген ресми хабарламада.

Айта кетсек, Үкіметаралық келісімге сәйкес, Байқоңыр қаласының тұрғыны болып қала аумағында тұратын және Байқоңыр қаласының әкімшілігінде тіркелген Қазақстан Республикасының азаматы немесе Ресей Федерациясының азаматы танылады.

Оқи отырыңыз