Израиль мен ХАМАС арасындағы уақытша бітім басталды

Газа секторы, Израиль, Палестина, атыс, соғыс, бітім, сурет - Zakon.kz жаңалық 24.11.2023 11:47

Сурет: pixabay

Жұма, 24 қараша күні Израиль мен ХАМАС төрт күндік бітімге келді. Содырлар кепілге алынғандардың 13 адамнан тұратын алғашқы тобын – әйелдер мен балаларды босатқалы жатыр, деп хабарлайды Zakon.kz.

Бітім жергілікті уақыт бойынша таңғы сағат 7-де (Астана уақыты бойынша 11-де) басталды, ол Газа секторының солтүстігі мен оңтүстігінде жан-жақты атысты тоқтатуды, содан кейін кепілге алынған 240-тан астам адамның кейбірін босатуды көздейді, деп мәлімдеді SCMP.

Бітім басталғанға дейін атыс тоқтаған жоқ. Екі тарап та бітім соғыс қайта басталғанға дейін уақытша болатынын ұқтырды.

Бүгін Газаға қосымша көмек келе бастайды және жергілікті уақыт бойынша сағат 16:00-де (Астана уақыты бойынша 20:00) кепілге алынғандардың алғашқы легі, оның ішінде әйелдер босатылады. Төрт күн ішінде 50 адам босатылады, деді Қатар Сыртқы істер министрлігінің ресми өкілі Маджед әл-Ансари Дохада.

Кепілге алынғандардың кем дегенде 35-і балалар, олардың 18-і ХАМАС шабуыл жасаған кезде 10 жаста немесе одан кіші болған.

Египет бітім басталғаннан кейін Газаға күн сайын 130 мың литр дизельдік отын мен төрт жүк көлігімен газ, бұған қоса 200 жүк көлігімен гуманитарлық көмек жеткізілетінін мәлімдеді.

Соғыс басталғанда Израиль Египеттен келетін аз мөлшердегі азық-түлік, су және дәрі-дәрмектен басқа барлық импортты тоқтатты. Жанармай тапшылығы бүкіл аймақта электр қуатын өшіруге әкеліп соқтырды, үйлер мен ауруханалар генераторларға тәуелді болып қалды, оның өзі жиі сөніп қалады.

Қатар өкілі журналистерге палестиналықтар Израиль түрмелерінен босатылады деп күтіліп отырғанын айтты.