Сәуірдің 22-сі күні Ұлттық қауіпсіздік мемлекеттік комитетінің қызметкерлері мен Ош қалалық ішкі істер басқармасының полиция қызметкерлері күдікті Караматхон Абдуллаевты ұстады, деп жазды Kaktus.media.
Абдуллаев 2010 жылы маусымда Қырғызстанның Ош қаласында, Ош және Жалал-Абад облыстарында жаппай тәртіпсіздіктер мен ұлтаралық араздықты ұйымдастырды деген күдікпен сол жылдан бері іздеуде жүрген.
Караматхон Абдуллаев сырттай 16 жылға бас бостандығынан айырылды. Қырғызстан билігінің талабы бойынша қылмыстық іс бойынша айыпталушылар Интерпол арқылы іздеуге жарияланды.
Маусым оқиғасы бойынша қылмыстық тергеу 2021 жылдың сәуірінде қайта жалғасты. Тергеу Қырғыз Республикасы Қылмыстық кодексінің "Қызмет бабын асыра пайдалану" бабы бойынша жүргізілді.
Уақытша үкіметтің шенеуніктеріне қатысты іс экс-депутат Қадыржан Батыровтың елден кедергісіз кетуіне ықпал ету фактісі бойынша қозғалды, бұл қайғылы салдарға себеп болған.
Сәуір төңкерісінен кейін 2010 жылдың жазында Қырғыз Республикасының оңтүстігінде ұлтаралық қақтығыс басталып, оның барысында 400-ден астам адам қаза тапты. 2021 жылы Ұлттық қауіпсіздік мемлекеттік комитеті бұл оқиғаларды тергеуді қайта бастағаны белгілі болды. Іс сотқа жіберілді.
