Ұлттық статистика бюросының хабарлауынша, жалпы республика бойынша 2023 жылдың екінші тоқсанында үй шаруашылығының шығысы 260,8 мың теңге болды. Бұл былтырғы сәйкес кезеңмен салыстырғанда 15,8% көп. Халықтың орташа жан басына шаққандағы атаулы ақшалай табысы осы уақытта 19,1% өсіп, 283,6 мың теңге болған.
Өңірлерге келсек, жан басына шаққандағы табыс бойынша Астана көш бастап тұр (408,1 мың теңге), ал Қарағанды облысы екінші орында (368 мың теңге). Үздік үштікті Алматы түйіндеп тұр (363,6 мың теңге). Жетісу өңірінің тұрғындарының жан басына шаққандағы орташа табысының ең төмені – 203,2 мың теңге.
Шығын бойынша жағдай ұқсас, бірақ аймақтардың орналасуы басқаша: ай сайынғы шығыс бойынша Алматы қаласының тұрғындары алдыңғы орында (359,4 мың теңге). Одан кейін Астана тұрғындары (345,8 мың теңге) тұр. Ал Қарағанды облысы үшінші орында (323,5 мың теңге). Ең аз ақшаны Түркістан облысының тұрғындары (жан басына шаққанда 180,9 мың теңге) жұмсайды. Бұл ретте қазақстандықтардың шығынының жартысынан астамы азық-түлікке жұмсалады.
"2023 жылдың екінші тоқсанында халықтың ақшалай шығысының 91,8%-ы тұтыну шығысына кеткен. Оның ішінде 51,9%-ы азық-түлікке, 22,2%-ы азық-түлікке жатпайтын тауарларға, 17,7%-ы ақылы қызмет көрсетуге жұмсалған", – делінген статистика мамандарының хабарламасында.
Ұлттық статистика бюросы халықтың кірісіне тек жалақы емес, сонымен қатар барлық басқа кіріс – жәрдемақы, толық емес жұмыс төлемі және тағы басқалары кіретінін еске салды. Ақшалай шығынға тұтыну шығыны ғана емес, сонымен қатар алимент төлемдері, салықтар, несиені өтеу және тағы басқалары жатады.