ҰСБ мәліметтерінше, наурыз айының қорытындысы бойынша инфляция баяулап, 11%-ға дейін төмендеді.
Жылдық инфляция және айлық инфляция бойынша оң нәтижелер тіркелді. Сондықтан ақша-несие саясаты, Үкіметтің шаралары, оның ішінде анағұрлым күшті теңге инфляциялық қарсы жақсы әсер етуде. Тимур Сүлейменов Ұлттық Банк бұл, оның ішінде базалық мөлшерлеме әрекетінің табиғи әсері екенін атап айтты.
Сондай-ақ, Ұлттық Банк төрағасы коммуналдық тарифтер мен ЖЖМ шекті бағасының өсіміне енгізілген мораторий мерзімінің аяқталуы инфляцияға қалай әсер ететінін айтып, өз ойымен бөлісті.
"ЖЖМ бағасын және табиғи монополистердің тарифтерін реттеу жағына Үкіметтегі әріптестер жауапты. Олар инфляциялық қысым жағдайын және тарифтердің қалыпты әрі табиғи өсімін ұстануды өте жақсы түсінеді, яғни инфляцияны басып озбайтындай. Сондықтан, олардың бүгін немесе жақын арада жариялайтын шешімдері, негізінен, біздің қолда бар инфляциялық құбылыстарды толық ескере отырып, жасалады деп ойлаймын. Менің ойымша, олар бұл жағына барынша байыппен келетін болады". Тимур Сүлейменов
Сарапшылар инфляцияның төмендеуі кездейсоқ еместігін, күтілетін базалық мөлшерлеменің жоғарылауының әсері болатынын айтады.
"Инфляцияның баяулауы, ең алдымен, тек бір факторға емес, олардың жиынтығына байланысты. Қатаң ақша-несие саясаты, әрине, маңызды рөл атқарды: Ұлттық Банк наурыз айында базалық мөлшерлемені 18% деңгейінде ұстады және мұндай жағдайлар, әдетте, сұраныстың аптығын басады, жинақтауды қолдайды және бағаның қайта көтерілу қаупін азайтады". Қаржыгер, Qazaq Expert Club мүшесі Венера Жаналина
Сонымен қатар, оның айтуынша, Ұлттық банктің өзі факторлардың неғұрлым кең жиынтығын алға тартуда: орташа қатаң ақша-несие жағдайларынан бөлек, теңгенің нығаюы және реттелетін қызметтер мен ЖЖМ-нің инфляцияға аз да болса үлесі маңызды рөл атқарды.
Бұған дейін доллардың құны 480 теңгеден де төмендеуі мүмкін бе деген сауалға қатысты Ұлттық Банк өз жауабын алға тартқан болатын.