Биылғы жылдың 10 желтоқсанында Жоғарғы Сот Кеңесінің төрағасы Денис Шипп еліміздің заң қоғамдастығымен кездесу өткізді. Басқосуда судьяларды іріктеу мәселелері, Кеңестің даму перспективалары, сондай-ақ адвокаттарды қызықтыратын мәселелер талқыға салынды, деп хабарлайды Zakon.kz.
Шараға еліміздің барлық аймақтарынан 70-тен астам заңгер қатысты. Олардың ішінде: Қазақстандық заңгерлер одағының өкілдері, адвокаттар, нотариустар, «Kazakhstan Bar Association» заң консультанттары палатасының өкілдері, барлық деңгейдегі судьялар, ғылыми қоғамдастығының өкілдері.
Жиын барысында қатысушылардың назарына Кеңестің қызметі, судьяларды іріктеу сапасын арттыру және сот корпусына біліктілігі жоғары мамандарды тарту бағытында атқарылып жатқан жұмыстар мен жоспардағы жаңа іс-шаралар туралы ақпарат ұсынылды.
Заңгерлер өз кезегінде Кеңес өкілдеріне өздерін қызықтырған сұрақтарын қойып, оларға толымды жауаптар алды. Әсіресе судьялардың тәуелсіздігін, олардың әлеуметтік және материалдық қамтамасыз етілуі, сот жүктемесін азайту сынды тақырыптар қозғалды. Сондай-ақ, Кеңес қызметіндегі жұртшылықтың үлесін одан әрі арттыру, іріктеудің ашықтығын қамтамасыз ету, үміткерлердің жеке қасиеттеріне қойылатын талаптарды күшейту жөнінде ұсыныстар айтылды.
Жиын соңында жиынға қатысушылар өзара пікір алмасып, сот жүйесінің HR стратегиясын жетілдіру бойынша ұсыныстарды талқылады.
Сурет: Жоғарғы Сот Кеңесі аппаратының баспасөз қызметі
