Бұл туралы "Хабар 24" телеарнасы хабарлады.
Әбдіғали Қаймолдин 1941 жылы мектеп оқушысы бола тұра, майданға аттанған. Бұл жылдары, әсіресе, Сталинград түбіндегі шайқас – соғыстың бетбұрыс кезеңі болғаны тарихтан мәлім.
Сол шақтағы Әбдіғали батыр кеудесін оққа тосып ауыр жарақат алса да, жеңіс туының желбіреуіне атсалысты. Ерлігі мен батылдығы үшін ол, қан майданнан бірнеше орден, медальмен оралған.
"Халқыңды сүй, халқыңды сүйсең халық сені сүйеді. Бауыржан Момышұлы қандай болды. Сол сияқты адал, Отаныңа адал бол. Отан деген сөз "әке" деген сөз". Халық қаһарманы Әбдіғали Қаймолдин
Қазір Әбдіғали Қаймолдиннің 9 немересі, 4 шөбересі бар.
Еске салайық, бүгін, 8 мамырда Президент Қасым-Жомарт Тоқаевтың жарлығымен 1941–1945 жылдардағы соғыста көрсеткен ерлігі, батылдығы, жанқиярлығы мен соғыстан кейін мемлекеттік және қоғамдық қызметке белсенді қатысқаны үшін Әбдіғали Қаймолдинге және 1941–1945 жылдардағы соғыста көрсеткен ерлігі мен жанқиярлығы үшін Жеңіс Парадының қатысушысы Иван Гапичке "Халық қаһарманы" атағы беріліп, айрықша ерекшелік белгісі – "Алтын жұлдыз" бен "Отан" ордені тапсырылды.