Астана қаласы Тілдерді дамыту және архивтер басқармасы басшысының орынбасары Әйгерім Молдабаева елорда көшелерінің атауын өзгертуді ұсынды.
"Қазіргі таңда 60-тан астам көше мен 15 мектепке жаңа атаулар беру бойынша дайын ұсыныстар бар. Бұл ұсыныстар алдағы уақытта өтетін ономастикалық комиссия отырысының күн тәртібіне енгізіледі", - деді ол.
Оның айтуынша, елордада 17 даңғыл, төрт тас жол және 1110 көше бар. Олардың көпшілігі 1997 жылдан кейін көрнекті тұлғалар мен тарихи топонимдердің құрметіне жаңа атауларға ие болды.
2023 жылдың басынан тоғыз орталық көшеге, бір алаңға, жаңадан құрылған ауданға атау берілді, сондай-ақ екі көшеге атау берілді, өткен жылы осындай 41 элемент болды.
Қала көшелері көрнекті қолбасшы Сұлтан Бейбарыс, журналист Әскен Нәбиев, балалар жазушысы Бердібек Соқпақбаев, белгілі академик, энергетик Шафик Шөкин сияқты есімдерге ие. Сондай-ақ бұл – Орал Мұхамеджанов, Сафуан Шаймерденов, Дүкенбай Досжан, Еркеғали Рахмадиев сияқты Қазақстанның қайраткерлерінің есімдері және Бозоқ, Ботай, Түймекент сияқты жер атаулары.
Ал, халықаралық қарым-қатынасты нығайту мақсатында елорда көшелерінің біріне Әзірбайжан президенті болған Гейдар Әлиев есімі берілсе, жаңа алаңға «БҰҰ алаңы» деген атау берілді.
Бұған дейін Мәдениет және спорт министрлігі Қазақстанда елді мекендер мен көшелердің атауларын өзгерту кезінде тұрғындардың пікірі ескерілетінін хабарлаған болатын.
Оқи отырыңыз
