Өзгерістерді алматылықтар байқап, фото-видеоға түсіріп, бөліскен. Қазір желіде түрлі атау жазылған бұрынғы McDonald's дәмханалары түсірілген кадрлар тарап жатыр.
Дәмхана маңдайшаларында "Мен Аружанмын", "Мен Юлиямын", Мен "Мәдиярмын", "Мен Әйгеріммін" және тағы басқа деп жазылған. Қазақстандықтар бұл жаңалықтың логикасын түсініп көруге тырысып жатыр. "Рестораторлар мекемелердің атауын осылай қойып отыр ма?" деп таңданды жұрт.
Басқарушы компания мұндай өзгеріс болғанын түсіндірді, бірақ оның мәнін кейінірек ашуға уәде беріп отыр.
"Қазір Қазақстанның 6 қаласындағы 24 мейрамхананың маңдайшалары жаңарды", - деді "Food Solutions KZ" ЖШС баспасөз қызметі.
2023 жылдың 5 қаңтарында McDonald's Қазақстандағы жұмысын тоқтатты. Екі апта өтпей жатып "Вкусно-и Точка" азық-түлік желісі Қазақстанда тауар таңбасын тіркеуге өтініш бергені белгілі болды. Қаңтар айының соңында Қазақстанда атауы жоқ бұрынғы McDonald's мейрамханалары ашылды.
