Колледж студенттерін ынталандыру мақсатында 2023 жылдың қыркүйегінен бастап шәкіртақыны кезең-кезеңімен арттыру қарастырылған:
- 2023 жылғы 1 қыркүйектен бастап – 50%-ға,
- 2024 жылы 100%-ға жеткізумен.
"Мемлекеттік тапсырыс бойынша оқитын студенттерге әлеуметтік қолдау – шәкіртақы, тамақ және жолақы қарастырылған. Сонымен қатар, жаңа оқу жылында колледж студенттері үшін 2,5 мың орындық 13 жаңа жатақхана ашылады". Қазақстан Республикасы Білім министрлігінің Баспасөз қызметі
Ведомствоның мәліметінше, 190 мың колледж студенті жаңа оқу жылын бастап жатыр, оның 133 мыңы мемлекеттік білім беру тапсырысы бойынша оқиды. Кәсіпорындардың сұранысы бойынша – 10 мың студент.
"Мемлекет басшысының тапсырмасы бойынша биылғы жылы мемлекеттік білім беру тапсырысы 50 мың орынға ұлғайтылды. Квота санаты бойынша техникалық және кәсіптік білім беру ұйымдарының 75 мың студенті оқиды". Қазақстан Республикасы Білім министрлігінің Баспасөз қызметі
Ведомство мемлекеттік тапсырыстың техникалық мамандықтарға қайта бағдарланғанын атап өтті. Олардың қатарында геология, энергетика, металлургия және машина жасау, көлік, IT, құрылыс, педагогика және медицина сияқты салалар бар.
Бұған дейін Қазақстан халқын оқу жылының басталуымен Президент Қасым-Жомарт Тоқаев пен Білім министрі Ғани Бейсембаев құттықтады.
