Қазақстан Республикасы Қарулы Күштері Бас штабы Ұйымдастыру-жұмылдыру жұмыстары департаменті бастығының орынбасары Азамат Досымов атап өткендей, көктемгі әскерге шақыру науқаны 30 маусымға дейін жалғасады.
"Қарулы Күштер мен әскери құралымдардың қатарын әскерге шақырудан кейінге қалдыруға немесе босатуға негіз жоқ 18 бен 27 жас аралығындағы 20 мыңнан астам мерзімді әскери қызметші толықтырады.Осылайша, Қарулы Күштерге 9 мыңнан астам, Ұлттық ұланға - 6 мыңнан астам, Ұлттық қауіпсіздік комитетінің Шекара қызметіне - 3 мыңға жуық, Төтенше жағдайлар министрлігіне - 300-ден астам және Мемлекеттік күзет қызметіне - 300-ге жуық әскер қатарына шақырылғандар", – дейді Азамат Досымов.
Бұған дейін Қазақстанда Қарулы Күштердің, басқа да әскерлер мен әскери құралымдардың әскери қызметшілері үшін бірыңғай киім үлгісі енгізілген болатын.
Енді әскери қызметкерлер түкті (қаракөл) жағасы бар қысқы күртешенің орнына аляска үлгісіндегі күрте киетін болды. Сонымен қатар, бас киімдер аға офицерлерді қоспағанда, қалқасыз болады. Көктем мен күз маусымында пальто камуфляжды далалық күртеге, ал жемпір далалық күртеге ауыстырылды.
