Үкімет Ақтөбе қаласында ерекше балаларға арналған арнайы балабақша салуға шамамен 7,8 млрд теңге бөлу туралы шешім қабылдады. Балабақшаның ашылуы 300 ерекше баланы тәрбиемен және түзету көмегімен қамтамасыз етеді. Мекеме мектеп жасына дейінгі балаларға жайлы болу, дамыту және оқыту үшін барлық қажетті заттармен жабдықталады.
"Бүгінгі таңда облыста ерекше білім беруді қажет ететін 3 жастан 6 жасқа дейінгі 2523-тен астам бала бар, олардың 1320-ы мектепке дейінгі біліммен қамтылған. Қазір облыс бойынша 4 арнайы түзету балабақшасы жұмыс істейді. Жобаны іске асыру қажетті инфрақұрылымды құруға және ерекше қажеттіліктері бар балаларды дамыту мен тәрбиелеуді қамтуды кеңейтуге мүмкіндік береді",- делінген Үкімет ақпаратында.
Бұған дейін келесі жобаларды қаржыландыру туралы шешім қабылданған болатын.
- Ақмола облысының Зеренді ауылында спорт кешенін,
- Түркістан облысының Темірлан ауылында музыка мектебін,
- Арқалық қаласында дарынды спортшы балаларға арналған спорт кешенін,
- Астанада тірек-қимыл аппараты бұзылған балаларға арналған оңалту орталығын,
- Алматыда ерекше қажеттіліктері бар адамдарға арналған жаттығу орталығын.
Бұған дейін Үшарал әуежайында жаңа терминал салынғаны хабарланған болатын.
