Қала полициясы таратқан ақпаратқа сәйкес, күдікті күндізгі уақытта, үй иелері сыртта болған сәтте, баспаналарға еркін еніп, ұрлық жасаған.
Алматы қалалық полиция департаменті криминалдық полиция басқармасының бастығы Талант Исаевтың айтуынша, қазіргі таңда оның кем дегенде бес ұрлық фактісіне қатысы бар екені анықталып отыр.
Бұл қылмыстар қаланың әртүрлі аудандарында тіркелген. Жәбірленушілерге келтірілген жалпы материалдық шығын көлемі 800 мың теңгеден асады.
"Күдікті ұсталған кезде оқиға орнынан айғақты заттар тәркіленді. Қазіргі уақытта оның басқа да осыған ұқсас қылмыстарға қатысы бар-жоғы тексерілуде. Тергеу шаралары жалғасып жатыр", – деп мәлімдеді Талант Исаев.
Полиция тұрғындарды қарапайым қауіпсіздік шараларын сақтауға шақырады: үйден шығарда есік пен терезенің жабық екеніне көз жеткізіп, сенімді құлыптар орнату және бейнебақылау жүйелерін қолдану қажет. Мұндай алдын алу шаралары азаматтардың мүлкін сақтауға сеп болады.