Десанттық-шабуылдау әскерлерінің қолбасшысы, генерал-майор Алмаз Жұмакеев Қорғаныс ведомствосының басшысына Десанттық-шабуылдау әскерлерінің "Жағалау" оқу-жаттығу орталығындағы жүріп жатқан құрылыс пен жөндеу жұмыстарының барысы туралы баяндады.
Оның айтуынша, мұнда десанттық әскерлерге арналған бронетранспортерлер мен "Арлан" броньды машиналарының жүргізушілерін даярлау жүргізілуде.
Сурет: ҚР Қорғаныс министрлігі
Қазіргі уақытта жаңа кең асхана, штаб ғимараты, бақылау-өткізу пункті, казармаларға күрделі жөндеу жүргізу және жаңаларын салу жұмыстары жалғасуда.
Райымбек батыр атындағы 38-десанттық-шабуылдау бригадасында Қорғаныс министрі әуе-десанттық даярлық сыныбын аралап, әскери бөлімнің негізгі міндеттері туралы егжей-тегжейлі сұрап білді.
Ол парашютпен секіру және басқа да оқу-жаттығу міндеттерін орындау кезінде қауіпсіздік шараларын қатаң сақтауға ерекше назар аударды.
Сурет: ҚР Қорғаныс министрлігі
"Жас десантшы" балалар әскери-патриоттық орталығында Қорғаныс министрін орталық тәрбиеленушілері қарсы алды. Балаларға енді үйірмелер мен секцияларға бару үшін қалаға шығудың қажеті жоқ екенін айтты.
Сурет: ҚР Қорғаныс министрлігі
Айта кетейік, бұл дамыту орталығы өткен жылы ашылған. Көп уақытын қызметке арнайтын Алматы десантшыларының отбасыларында мектеп жасындағы 3000-нан астам бала бар. Осы балалар үшін орталықта тегін робототехника, шахмат, шешендік өнер, мобилография, хореография, сурет салу, ағылшын тілі және домбыра тарту үйірмелері жұмыс істейді.
Сурет: ҚР Қорғаныс министрлігі
Жұмыс сапарының соңында авиация генерал-лейтенанты Дәурен Қосанов Десанттық-шабуылдау әскерлерінің қолбасшысына әскерді дамыту, жеке құрамның жауынгерлік әзірлігі мен моральдық рухын жоғары деңгейде ұстау жөнінде бірқатар нақты тапсырмалар берді.
Сурет: ҚР Қорғаныс министрлігі