Министрдің айтуынша, қазіргі уақытта еліміздегі 8 мыңнан астам мектепте 4,1 миллион оқушы білім алуда.
"Биыл бірінші сыныпқа 341 мың бала қабылданады. 11-сыныпқа 232 мың оқушы өтті. Жаңа оқу жылының ерекшелігі – жасанды интеллектті орта білім беру жүйесіне енгізу болмақ. Осыған орай "Цифрлық сауаттылық" пен "Информатика" пәндеріне жасанды интеллект құралдары кіріктіріліп, этикалық стандарттар бекітілді. 1–11-сынып оқушыларына арналған "Day of AI" онлайн курстары әзірленді, сондай-ақ мұғалімдерге арналған курстар ұйымдастырылады", – деді Ғани Бейсембаев.
Министр сондай-ақ Мемлекет басшысының тапсырмасы бойынша жаңа оқу жылынан бастап "Келешек мектептері" басқару моделі іске қосылатынын атап өтті.
"Ол үшін жаңа басқару стандарты қабылданды, аккредитация стандарттары әзірленді. Үш деңгейлі курстан өткен 3 мыңнан астам педагог биылғы оқу жылында жаңа жүйеде жұмысын бастайды", – деді министр.
Бұған дейін Қазақстан мектептерінде 2025 жылы оқу жылының қашан басталатыны белгілі болған.