Метеорологтардың мәліметінше, атмосфералық фронттардың өтуіне байланысты еліміздің басым бөлігінде ауа райы құбылмалы болады.
Синоптиктердің болжамынша, жаңбыр жауып, найзағай ойнайды, жел күшейеді. Кей өңірлерде дауыл соғып, бұршақ жаууы мүмкін.
Қатты жаңбыр:
- 16 маусымда Маңғыстау, Солтүстік Қазақстан және Ақмола облыстарында;
- 18 маусымда Солтүстік Қазақстан және Ақмола облыстарында күтіледі.
Сонымен қатар алдағы күндері еліміздің бірқатар өңірінде аптап ыстық сақталады.
Атап айтқанда, оңтүстік-батыс пен оңтүстікте күндіз ауа температурасы +35...+40 градусқа дейін көтеріледі. Ал солтүстік, шығыс және орталық өңірлерде +35...+38 градусқа дейін ыстық болады.
"Еліміздің қалған аумағында температуралық фонда айтарлықтай өзгеріс күтілмейді", – деп хабарлады "Қазгидромет" мамандары.
Бұған дейін синоптиктер Алматы мен Ақтөбе тұрғындарына қолайсыз метеорологиялық жағдайларға байланысты ескерту жасаған болатын.