Құжат Қазақстанның экологиялық заңнамасын жетілдіру мақсатында әзірленген.
Заң жобасы экология саласын цифрландыруға, қалдықтарды басқару жүйесін жетілдіруге, климаттық реттеу тетіктерін дамытуға, сондай-ақ экологиялық бақылау мен қадағалаудың тиімділігін арттыруға бағытталған бірқатар заңнамалық актілерге өзгерістер мен толықтырулар енгізуді көздейді.
Заң жобасының негізгі нормалары:
- экология саласын цифрландыру және экологиялық реттеу мен бақылауды жетілдіру;
- көміртегі офсеттері мен климаттық қаржыландыру тетіктерін дамыту;
- қалдықтарды басқару және қайталама ресурстарды қайта өңдеу жүйесін жетілдіру;
- өндірушілер мен импорттаушылардың кеңейтілген міндеттемелері қағидатын іске асыруды жетілдіру;
- Ұлттық гидрометеорологиялық қызметтің жұмысын жетілдіру;
- мемлекеттік экологиялық сараптама мен қоғамдық тыңдаулар өткізу рәсімдерін оңтайландыру;
- инвестициялық жобалар мен көмірсутектерді барлау жобалары үшін (теңіздегі барлаудан басқа) экологиялық рұқсаттар мен қорытындылар алу мерзімдерін қысқарту;
- қалдықтарды басқару және қайталама ресурстарды өңдеу жүйесін ұйымдастырушылық-техникалық әрі ақпараттық қамтамасыз ету тәртібін бекіту құзыретін уәкілетті органға беру;
- ауылдар, кенттер және ауылдық округтердің жергілікті атқарушы органдарына коммуналдық қалдықтарды жинау, сұрыптау және көму орындарын ұйымдастыру құзыретін беру;
- қалдықтарды тұрақты есепке алу нысанын және оны толтыру жөніндегі нұсқаулықты бекіту арқылы есепке алу жүйесін жетілдіру;
- мемлекеттік орман қоры аумағында өртті ерте анықтау жүйесін енгізуді материалдық-техникалық қамтамасыз ету бойынша өндірушілердің (импорттаушылардың) кеңейтілген міндеттемелері операторының функцияларын кеңейту;
- климаттық қаржыландыру қағидаларын және Біріккен Ұлттар Ұйымы-ның Климаттың өзгеруі жөніндегі негіздемелік конвенциясы аясындағы Париж келісімінің 6-бабы бойынша нарықтық тетіктерді іске асыру қағидаларын бекіту құзыретін айқындау;
- киік туындыларының айналымы жүйесінің операторын, оның өкілеттіктерін және киік туындыларын өткізу тәртібін белгілеу.
Бұған дейін Экология министрлігі Атырау облысына экологиялық апат аймағы мәртебесін беру мәселесіне қатысты түсініктеме берген болатын.