Жамбыл облысы Қордай ауданындағы тәртіпсіздік фактілері бойынша 25 қылмыстық іс қозғалды, деп хабарлайды zakon.kz baigenews.kz ресурсына сілтеме жасап.
Жаппай тәртіпсіздік фактілері бойынша 25 қылмыстық іс қозғалды. Атап айтқанда: жаппай тәртіпсіздікке шақыру, кісі өлтіру, бұзақылық, мемлекеттік қызметкерлерге күш қолдану, жекенің мүлкін бүлдіру, сондай-ақ заңсыз қару-жарақ өндіру және сақтау, - деді Премьер-министрдің орынбасары Бердібек Сапарбаев Сортөбе ауылында өткен арнайы баспасөз мәслихатынан кейін.
Оның айтуынша, соңғы екі тәулікте ешқандай оқыс оқиға тіркелген жоқ. Бизнес нысандары жұмысқа кірісті, балалар сабаққа барып жатыр.
Бүгіндері мамандар келтірілген шығын көлемін есептеп жатыр. Құрылыс материалдарына бюджеттен қаражат бөлінеді, үйлерді өз бетімен жөндеуге шешім қабылдаған адамдарға ақша да төленеді, - деді Сапарбаев.
7 ақпанда Жамбыл облысы Масаншы ауылында тұрғындар арасында жаппай төбелес болып, салдарынан 10 адам қайтыс болды.
