Жамбыл облысы Қордай ауданындағы тәртіпсіздіктен 19 полиция қызметкері жарақат алды. Оның ішінде Алматы облысы полиция департаменті бастығының бірінші орынбасары да бар, деп хабарлайды zakon.kz Polisia.kz ресурсына сілтеме жасап.
8-ақпанда қақтығыстың алдын алу және оны оқшаулау үшін оқиға орындарына алғашқылардың бірі болып Жамбыл және Алматы облысы полиция департаментінің жедел әрекет ету арнайы жасағының қызметкерлері келді. Тәртіпсіздік кезінде 19 қызметкер түрлі дене жарақатын алғаны, 9 – ы- атыс кезінде жарақаттанғаны белгілі болды.
Соның ішінде Алматы облыстық полиция департаменті бастығының бірінші орынбасары Серік Жүнісбеков жарақат алғандардың қатарында бар. Оған жасалған операция сәтті шығып, қазіргі уақытта денсаулығына қауіп төніп тұрған жоқ. Арнайы жасақ инспекторларының бірінінің беті мен сол аяғына оқ тиген. Тағы бір жасақ инспекторы - екі санның жоғарғы жартысынан жарақат алды.
Жағдай тұрақталып, полицейлер бақылауға алғаннан кейін, қызметкерлер орталық аудандық аурухананың қызметіне жүгінді. Қорғаныс құралдары мен оқ өткізбейтін арнайы киімдердің (бронежилет) арқасында қақтығыс кезінде алған жарақаттар санаты адам өміріне аса қауіпті емес екені анықталды. Зардап шеккендердің көпшілігі алғашқы медициналық көмек алғаннан кейін қатарға қосылып, қызметтерін жалғастыруда.
Қылмыстық кодекстің 380-бабы (Билік өкіліне қатысты күш қолдану) бойынша сотқа дейінгі тергеу жүргізілуде .
