Есік қаласында өзгенің көлігін ұрлап, екі жол-көлік оқиғасын жасады деген күдікке ілінген мас жүргізуші ұсталды, деп хабарлайды zakon.kz Алматы облысы ПД баспасөз қызметіне сілтеме жасап.
Түнгі сағат 2:00 шамасында Еңбекшіқазақ ауданының полициясына Есік қаласындағы қос жол-көлік оқиғасы туралы хабар түсті. Сонымен қатар, тәртіп сақшыларына телефон шалған 19 жастағы жергілікті тұрғын "Фольксваген Гольф" маркалы көлігінің қолды болғанын жеткізген.
"Күдікті азамат оқиға орнында қолға түсті. Ол Еңбекшіқазақ ауданында тіркеуде тұрған Өзбекстан елінің 34 жастағы азаматы болып шықты. Күдіктінің ішімдік ішіп, бөтен көлікті ұрлап, жол бойындағы өзге екі көлікті соққаны белгілі болды. Нәтижесінде көлік жүргізушілері дене жарақаттарын алып, автокөліктерге айтарлықтай нұқсан келген", - деді Еңбекшіқазақ ауданы Полиция басқармасының тергеушісі полиция лейтенанты Мақсат Жақсылықов.
Қазіргі уақытта күдікті мекенжайын өзгертпеу туралы міндеттемемен босатылды. Қолданыстағы қылмыстық заңнаманың 200-бабының 1-тармағымен қатар осы дерек бойынша ҚР Қылмыстық кодексінің 346-бабының 2-тармағына және ҚР ӘҚбК 608-бабына сәйкес іс қозғалды.