АҚШ-та дауыл 46 адамның өмірін қиды, Канаданың Британдық Колумбия провинциясында көктайғақта автобус аударылып, тағы төрт адам қаза тапты, деп жазды Sky News.
АҚШ-та қаза тапқандардың 18-і – Нью-Йорк штатындағы Буффало қаласының тұрғындары. Ол адамдар дауыл кезінде көлікте қалып қойған.
Ұлттық ауа райы қызметі 25 желтоқсанда Буффало әуежайында 1,2 метрге жуық қар жауғанын хабарлады.
Нью-Йорк губернаторы Кэти Хочул демалыс күндері штаттың көптеген жедел жәрдем көлігі мен өрт сөндіру көліктерін қар басып қалғанын мәлімдеді.
Буффало полиция департаменті қарда жүретін көлік иелерінен іздеу-құтқару жұмыстарына көмек сұрап онлайн үндеу жариялады.
АҚШ-та 1,8 миллионға жуық үй жарықсыз қалды, мыңдаған рейс тоқтатылды немесе кешіктірілді. Канадада кем дегенде 140 000 үй электр қуатынсыз қалды.