Павлодарда полицейлер қарақшылық шабуыл жасады деген күдікпен облыс орталығының 48 жастағы тұрғынын ұстады, деп мәлімдеді 7 тамызда қалалық полиция департаментінің баспасөз қызметі.
Полицейлердің мәлімдеуінше, ер адам Бұқар Жырау көшесіндегі үйге заңсыз кіріп, 2008 жылғы кәмелетке толмаған қызға зорлық-зомбылық көрсетіп, тапаншаға ұқсас затпен қорқытып, 250 мың теңге қаражатын қолды қылған. Бірақ ол бейнебақылау камерасына түсіп қалғанына мән бермеген.
"Павлодарлық полицейлер қарақшылық шабуыл жасаған күдіктіні "ізін суытпай" ұстады. ҚР ҚК 192-бабы 3-бөлігі бойынша сотқа дейінгі тергеу жүріп жатыр", – делінген хабарламада.
Ұсталған адам УҰИ-ге қамалды. Тергеу жалғасуда.