Астана қаласы прокуратурасының мәліметінше, полиция департаменті ҚК-тің 277-бабы 3-бөлігі – "Абайсызда екi немесе одан да көп адамның өлiмiне әкеп соққан құрылыс жұмыстарын жүргiзу кезiнде қауiпсiздiк қағидаларын бұзу" бабына сәйкес сотқа дейінгі тергеп-тексеру жүргізіп жатыр.
Тергеу барысында жұмыс беруші – ЖК басшысының қызметкерлердің қайтыс болуына қатысы бар екенін жөнінде дәлелдер жиналды. Қала прокуратурасының тапсырмасы бойынша тергеу органы ЖК басшысына қатысты "күзетпен ұстау" түріндегі бұлтартпау шарасын қолданды.
Құқық бұзушылыққа қатысы бар барлық адамдарды анықталып жатыр.
Қылмыстық істі тергеу барысы қала прокуратурасының бақылауында.
2023 жылы 12 қазанда Астанада құрылыс алаңдарының бірінде төрт альпинист биіктен құлады. Жедел медициналық жәрдем бригадасы келгенге дейін олардың бірі оқиға орнында көз жұмды, қалғандары шұғыл ауруханаға жеткізілді.
Кейінірек екінші альпинисттің жан тапсырғаны белгілі болды. 16 қазан күні ұшінші альпинист те қайтыс болды.
