Бұған дейін де ұрлық үшін қылмыстық жауапкершілікке тартылған күдіктінің маусым-тамыз айлары аралығында Жылыой ауданына қарасты Ақкиізтоғай ауылында 14 рет мал ұрлығын жасағаны анықталды.
Тергеу барысында ол 34 бас ірі қараны қолды қылып, жәбірленушілерге 5 миллион теңгеден астам шығын келтіргенін мойындады.
Жедел іздестіру шаралары барысында күдіктінің ұрланған малды әлеуметтік желілер арқылы сатқаны белгілі болды.
Полиция оның телефонын тексеру кезінде ұрланған малдың фотосуреттерін, сатып алушылармен жасалған хат алмасуларды және басқа да дәлелдерді тапты. Сонымен қатар ұрланған малды сатып алған адамдардың кім екені де анықталды.
Қазіргі таңда құқық қорғау органдары қосымша дәлелдерді жинау үшін күдіктінің қоңырауларының биллинг деректерін зерттеуде. Сондай-ақ бұл қылмысқа басқа адамдардың қатысы бар-жоғы анықталуда. Күдікті қамауға алынып, сотқа дейінгі тергеу амалдары жалғасып жатыр.
Полицияның дер кезінде жасаған әрекеттері нәтижесінде қылмыс әшкереленіп, заңсыз әрекеттердің жолы кесілді. Жәбірленушілерге келтірілген шығынды өтеу мәселесі де назардан тыс қалмайтыны белгілі.