Алдын ала мәліметке сәйкес, оқиға 15 наурызда болған. Қарауылдың үшінші бекетінде ведомстволық күзеттің азаматтық қызметкері – атқыш карабиннен абайсызда оқ атып, қарауыл бастығын жаралаған. Ауыр жараланған ол әскери госпитальға жеткізілгенімен, дәрігерлер оның өмірін сақтап қала алмады.
Бұл жағдайға қатысты Ішкі істер министрлігінің әскери-тергеу департаменті сотқа дейінгі тергеу басталғанын мәлімдеді.
""Жамбыл облысында әскерилендірілген күзет қызметінің азаматтық қызметкерінің қаза табу фактісі бойынша сотқа дейінгі тергеу жүргізілуде. Оқиғаның мән-жайы барлық қажетті тергеу әрекеттері мен процессуалдық шаралар жүргізілгеннен кейін анықталады", – деп хабарлады Ішкі істер министрлігінің Әскери-тергеу департаменті.
Айта кетейік, бұған дейін 12 наурызда Атырау гарнизонындағы әскери бөлімдердің бірінде жоспарлы далалық атыс кезінде мерзімді қызметтегі әскери қызметші жарақат алып, кейін көз жұмғаны хабарланған болатын.