Жыл басынан бері елордалық полицейлер сталкинг фактілері бойынша 26 деректі тіркеген. Мәселен, жуырда полицияның кезекші бөліміне 30 жастағы ер адамның бұрынғы сүйіктісін бірнеше ай бойы аңдығаны туралы хабарлама келіп түсті.
Қарым-қатынасты жалғастырудан бас тартқанына қарамастан, ол жәбірленушіге қайта-қайта қоңырау шалып, хабарламалар жіберген, жұмыс орны мен тұрғылықты жерінің маңында күтіп тұрған, сондай-ақ оның жүріп-тұруын бақылаған.
Мұндай әрекеттер жәбірленушінің жеке қауіпсіздігіне қатысты орынды алаңдаушылық туғызған. Аталған дерек бойынша өтініш тіркеліп, Қазақстан Республикасы Қылмыстық кодексінің 115-1-бабы негізінде сотқа дейінгі тергеп-тексеру басталды.
Құқық қорғау органдары сталкингтің зиянсыз әрекет емес екенін атап өтеді. Бұл — психологиялық қысым көрсетудің бір түрі және ол ауыр салдарға әкелуі мүмкін. Полиция еске салады: сталкингтің алдын алу, ең алдымен, жеке қауіпсіздікке мұқият қараудан басталады.
Аңдудың алғашқы белгілері байқалған жағдайда құқық бұзушымен байланысқа түспеу, қарым-қатынастан нақты бас тарту, барлық дәлелдерді (хабарламалар, қоңыраулар жазбасы, фото және бейнематериалдар) сақтау, әлеуметтік желілер мен мессенджерлердегі жеке ақпаратқа қолжетімділікті шектеу, сондай-ақ дереу құқық қорғау органдарына жүгіну қажет.
Уақтылы қабылданған шаралар жағдайдың ушығуына жол бермей, азаматтардың қауіпсіздігін қамтамасыз етуге мүмкіндік береді.