Сыбайлас жемқорлыққа қарсы мәдениетті қалыптастыруға бағытталған үздік журналистік жұмыстар анықталды

Биылғы жылы Жетісу облысы қоғамдық даму басқармасының ұйымдастыруымен дәстүрлі түрде өткізіліп жатқан облыстық БАҚ өкілдері арасында журналистік жұмыстардың облыстық байқауы өтті. Байқауға өңір журналистерінің жұмыстары қаралып, 6 үздік жұмыс іріктеліп, топ жарып шықты.

Сурет: МОО "Жетісу жастары ұйымының Конгресі"

Атап айтсақ, "Жетісу облысындағы мерзімді баспасөз басылымдарының сыбайлас жемқорлыққа қарсы тақырыптағы ең үздік жариялау" аталымы бойынша республикалық "Egemen Qazaqstan" газетінің Жетісу облысы бойынша меншікті тілшісі Мұхтар Күмісбекке, "Жетісу облысындағы интернет-ресурстардағы сыбайлас жемқорлыққа қарсы тақырыптар бойынша үздік мақала" аталымы бойынша "Алакөл" газетінің бас редакторы Есенбеков Алмат Асхатұлына, "Жетісу облысындағы телеарналардағы сыбайлас жемқорлыққа қарсы үздік бейнеролик" аталымы бойынша облыстық "Жетісу" телерадиокомпаниясының бағдарламалар бөлімінің редакторы Жұмабай Мұрат Дүйсембекұлына, "Жетісу облысындағы сыбайлас жемқорлыққа қарсы тақырыптар бойынша үздік журналистік зерттеу" аталымы бойынша облыстық "Jetisu" газетінің тілшісі Күлжиған Тұрсыноваға, "Жетісу облысының сыбайлас жемқорлыққа қарсы қызметін кеңінен жариялау" аталымы бойынша республикалық "Qazaqstan" телеарнасының Жетісу облысы бойынша меншікті тілшісі Серікқанов Қуаныш Қанатұлына, "Жетісу облысында әлеуметтік желілерде сыбайлас жемқорлықтың алдын алу бойынша ең үздік қамту" аталымы бойынша "Нұрлы Көксу" газетінің бас редакторы Ардагүл Əскербекке арнайы дипломмен және қаржылай сертификаттар табысталды.

Сурет: МОО "Жетісу жастары ұйымының Конгресі"

Марапаттау рәсімі ҚР Сыбайлас жемқорлыққа қарсы іс-қимыл агенттігінің (Сыбайлас жемқорлыққа қарсы қызмет) Жетісу облысы бойынша департаментінің басшысы Ахметжанов Саян Қылышұлының, Ардагер журналист, халықаралық "Алаш" әдеби сыйлығының иегері, "Жетісу" телерадиокомпаниясы директорының кеңесшісі, Халықаралық "Қазақ тілі" қоғамының облыстық бөлімшесінің төрағасы Әміре Әріннің қатысуымен өтті.

Сурет: МОО "Жетісу жастары ұйымының Конгресі"

Сонымен қатар, Жетісу облысында сыбайлас жемқорлықтың алдын алуға қосқан үлесі үшін бірқатар мемлекеттік қызметкерлер, журналистер мен қоғам белсенділері де арнайы алғыс хаттармен марапатталды.

Сурет: МОО "Жетісу жастары ұйымының Конгресі"