Қазақстандық банктер шетелдік банктермен бәсекеге төтеп бере ала ма

Қазақстандық банктер, жолдау, сурет - Zakon.kz жаңалық 01.09.2023 15:58

Сурет: pixabay

Парламент кулуарында Қаржы нарығын реттеу және дамыту агенттігінің төрайымы Мәдина Әбілқасымова "Қазақстандық банктер Қазақстанға келетін шетелдік банктермен бәсекеге төтеп бере ала ма?" деген сұрақ төңірегінде пікірін білдірді, деп хабарлайды Zakon.kz тілшісі.

Мәдина Әбілқасымова қазақстандық банктер еліміздің қаржы нарығына кіретін шетелдік ұйымдармен бәсекеге төтеп бере алады деп жауап қатты.

"Бәсекелестік болуы мүмкін, ол ресурстардың қолжетімділігін арттырады, егер олар төтеп бере ала ма деп сұрасаңыз, әрине, төтеп береді", – деді Мәдина Әбілқасымова.

Оның айтуынша, банктің тұрақтылығы мен оның бәсекеге қабілеттілігі ең алдымен цифрландыру мен корпоративтік басқару деңгейімен анықталады.

"Біздің банктер қазір қаржылық қызметтерді цифрландыруда алдыңғы қатарда. Оны өзіңіз де көріп отырсыз: барлық қаржылық қызметтер қосымшаларда ұсынылады, банкке бармай-ақ санаулы минуттарда кез келген қызметті алуға болады. Екіншісі – Корпоративтік басқару сапасы. Корпоративтік басқару деңгейі қажетті стандарттарға сәйкес болуы өте маңызды. Бұл біздің агенттіктің міндеті, біз барлық екінші деңгейлі банктердегі корпоративтік басқару деңгейін халықаралық стандарттарға жеткізу үшін осы бағытта көп жұмыс істеп жатырмыз", – деп түйіндеді сөзін Қаржы нарығын реттеу және дамыту агенттігінің төрайымы.

1 қыркүйекте Қасым-Жомарт Тоқаев Қазақстанға үш шетелдік банкті тартуды тапсырды.

Оқи отырыңыз