Тоқаев Каспий теңізінің проблемалық мәселелерін көтерді

Итбалықтың қырылуы жайында президент айтты, сурет - Zakon.kz жаңалық 07.11.2022 14:50

Сурет: pixabay

Қазақстан Президенті 7 қарашада Маңғыстау облысы жұртшылығымен кездесуінде өңірде бірқатар күрделі экологиялық проблемалар бар екенін атап өтті. Ең маңызды міндет – экологиялық тепе-теңдік пен Каспийдің биоалуандығын сақтау, деп хабарлайды Zakon.kz.

Қасым-Жомарт Тоқаев бүгінде итбалықтар мен балықтардың жаппай қырылу фактілері жиі тіркеліп жатқанын атап өтті.

Бүгінде итбалықтар мен балықтардың жаппай қырылуы жиілеп кетті. Бұған адам факторы және экологиялық ахуалдың өзгеруі әсер етіп жатыр. Итбалық Қазақстанның Қызыл кітабына енген. Бұл жануардың жойылып кетпеуін және оның санын бұрынғы қалпына жеткізуді мен тікелей бақылауда ұстап отырмын. Қазақстан Президенті

Жазда Орталық Азия экологиялық зерттеулер институтына бардым. Бұл мекеме итбалықтардың азаю себебін зерттейді.

Мұндай маңызды мәселеге кешенді ғылыми зерттеу жүргізу қажет. Бұған дейін Маңғыстау облысындағы итбалықтарды сақтау үшін мемлекеттік табиғи қорықтар құру жоспарланған болатын. Экология министрлігі бұл жұмысты тездетіп, тиісті шешім қабылдауы керек. Тоқаев

Итбалықтар мен балықтардың жаппай қырылуын анықтау үшін Каспий теңізінің айдыны мен жағалауында зерттеу жұмыстарын тұрақты жүргізген жөн, деді мемлекет басшысы.

Үкімет өкілетті органдарды теңізде жұмыс істеуге қажетті материалдық-техникалық құралдармен қамтамасыз етуге тиіс.

Каспийде заңсыз балық аулаудың жолын кесу қажет. Браконьерлер балықтың көбеюіне кесірін тигізіп, теңіздің экожүйесіне зардап келтіріп жатыр. Каспий теңізінің тартылуы – айрықша өзекті мәселенің бірі. Теңіз деңгейі 2005 жылдан бері бір метрден аса төмендеп кеткеніне бәріміз куәміз. Судың тартылу себебі мен оның салдарын жан-жақты зерттеу керек Осы орайда, Каспий теңізін зерттеумен айналысатын мемлекеттік ғылыми институт құрған жөн деп есептеймін. Сондай-ақ, Үкімет Каспий жағалауында орналасқан өзге мемлекеттердегі әріптестерімен тығыз жұмыс істеуі керек. Президент

Оқи отырыңыз