Жасөспірімдер арасында электронды темекі тұтынатындар көбейген
Сурет: unsplash
Вейптің түріне қарасаңыз түрлі-түсті ойыншық сияқты. Балаларды еліктіруге арналған теріс тәсіл болса керек. Бұл вейптің 16 мың түрі бар. Ең қорқыныштысы оның дені әлі зерттелмеген, деп жазады qazaqstan.tv.
"Мынау тауарларда никотиннің мөлшері темекіден қарағанда 68-70 есе көп. Бұл препораттар 100 пайыз онкологиялық ауруларға әкеледі." Абай Байгенжин, Медицина ғылымдарының докторы
Вейп әлемнің 33 елінде заң бойынша тиылған. Сатылмайды, қолданылмайды. Ал тағы 79 елде қоғамдық орындарда тұтынуға болмайды. Өкінішке қарай, бізде әлі түбегейлі тоқтатар шектеу жоқ. Салдары байқала бастағандай.
"Қазіргі таңда бір факті тіркелді. Ауруханаға науқас жасөспірім түсті. Онда бұған дейін тыныс жолдарында ақау болмаған. Тексерістердің нәтижесінде, оның бір жылдан бері тұрақты түрде электронды тұтынғаны белгілі болды." Гүлнәр Сәрсенбаева, ҚР Денсаулық сақтау министрлігі департамент директорының орынбасары
Осы өзекті мәселе кеңінен талқыланған жиынға дін өкілдері де қатысты. Бәрінің де вейптерге қатысты айтары ортақ.
"106 пәтуада электронды темекі бойынша мынандай шешімге келгенбіз. Электронды темекі адамның денсаулығына зиян болғандықтан, ысырапқа әкелетіндіктен харам, оны қолдануға болмайды дегенбіз." Батыржан Мансұров, ҚМДБ бөлім басшысы
Қазіргі таңда электронды темекі мен вейптерге тыйым салу мәселесі жаппай көтеріліп жатыр. Парламент депутаттары да бұл мәселеге мән берген. Тиісті заң шығып, будақтаған бұрыс бизнес бұғатталып, жасөспірімдердің тынысын ашсақ игі.
