Тоқаев Алматыдағы өрт қауіпсіздігінің жағдайын сынға алды
Сурет: akorda.kz
Ақорданың ақпаратында Мемлекет басшысы таяуда "Ақкент" ықшам ауданындағы көпқабатты тұрғын үйде болған өртті мысалға келтіріп, өрт қауіпсіздігі саласындағы ахуалды сынға алды.
Осыған байланысты Қасым-Жомарт Тоқаев келесі мәселелерді тапсырды:
- Төтенше жағдайлар министрлігіне өрт кезінде сақталуға тиіс қауіпсіздік шаралары жөнінде халықтың сауатын арттыру үшін жаппай оқу-жаттығу шараларын ұйымдастыруды тапсырды.
- Қала әкімдігіне өртке қарсы күрес қызметінің материалдық-техникалық базасын күшейту үшін пәрменді шаралар қабылдау міндеті жүктелді.
Қасым-Жомарт Тоқаев Алматыға жұмыс сапарымен 2023 жылғы 18 тамызда келді. Сапар аясында мемлекет басшысы қаланың гидротехникалық инфрақұрылымымен танысты, бірқатар әлеуметтік нысандарды аралады, сондай-ақ үкімет өкілдерінің қатысуымен Алматының әлеуметтік-экономикалық дамуы жөнінде кеңес өткізді.
Президент Қасым-Жомарт Тоқаевтың Алматыға жұмыс сапары 2023 жылдың 1 маусымында пайдалануға берілген Аюсай селді ұстайтын бөгетті аралаудан басталды. Аюсай бөгетінің жанында президентке 31 цифрлық өлшеу стансасын құру бойынша пилоттық жоба ұсынылды.
