Ақтөбе тұрғыны екі жылдан бері тірі екенін дәлелдей алмай жүр
Сурет: pixabay
38 жастағы келіншектің жеке куәлігі де, басқа құжаттары да түгел. Алайда, қазір қайтыс болған адамдардың тізімінде, деп жазады qazaqstan.tv.
Айтуынша, екі жыл бұрын Темір ауданында болған жол апаты кезінде қаза тапқан әйелдің орнына бұның жеке мәліметтері тіркеліп кеткен.
"Учасковыйлардың қатесі. Жеке мәліметті толтырғанда, менің жеке мәліметімді толтырып жіберген. Менің фамилияммен бірдей, қайтыс болған кезде менің жеке мәліметімді тіркеп жібереді. Жұмысқа тұра алмаймын. Медасмотр өте алмаймын. Ауруханаға барсам, қарамайды, өлгендердің қатарында тұрсың деп." Бота Қартбаева, Өрлеу ауылының тұрғыны
Ботаның алты баласы бар. 2022 жылдың басында мемлекеттен берілетін жәрдемақы да уақытша тоқтап қалыпты. Дегенмен оны кейін қалпына келтірді. Ал медицина мекемелеріне әлі күнге дейін тіркеле алмай жүр. Қарғалы қалалық ауруханасының мамандары да оған көмек қолын созбақшы болыпты. Денсаулық сақтау басқармасына, министрлікке бірнеше мәрте хат жазған. Алайда, әзірге нәтиже жоқ.
"Электронды денсаулық сақтауды дамыту депараментінен келген жауап бойынша, Қартбаеваның туыстарына, жеке жолдасына айтқан болатын, қайтыс болғандығын алып тастау үшін әділет орындарына жүгінуі тиіс немесе мәселені сот арқылы шешуді сұрадық." Күмісай Байболатова, Қарғалы қалалық ауруханасы бас дәрігерінің орынбасары
Алайда, Бота Қартбаева Басқаның қателігі үшін мен неліктен қорғаушы жалдап, қаржым мен уақытымды жоғалтуым керек дейді. Облыстық полиция департаментінің өкілдері барлық инстанцияларға нақты сауалнамалық деректер жіберілгенін хабарлады. Көп балалы ананың жеке деректеріне өзгеріс енгізу үшін денсаулық сақтау министрлігіне хат жолданған.
