"Бір күнде жараландық": Талдықорғандық ардагер Бауыржан Момышұлымен бірге соғысқан күндерін еске алды
Сурет: Сәрсенбай Қаңтарбайұлының отбасылық жеке мұрағатынан
Ғасыр жасаған Сәрсенбай атамыз Жеңіс күнін аман-сау қарсы алып, естеліктерімен бөлісті. Ол әйгілі Бауыржан Момышұлы басқарған дивизияда соғысқан.
"Момышұлы қатал, әрі әділ еді. Әр адамға ілтипатпен қарайтын, әрдайым қолдау көрсетуге тырысатын. Алайда бірдеңе болып қалса, сазайын тарттыратын. Артымызда Отан, ата-анамыз, бала-шағамыз, әйелдеріміз бар болғандықтан, ұрыста ерлік пен шеберлік қажет екенін айтатын. Біз оларға жауды бір қадамға да жібермейміз, деп жігерімізді қайрап отыратын!", - деп естелігімен бөлісті Сәрсенбай Қаңтарбай.
Материалымыздың кейіпкері 1924 жылы 10 мамырда Жетісу жерінде, ол кезде Дүнгене аталып кеткен Балпық би ауылында дүниеге келген. 1942 жылы майданға шақырылып, бірден Аягөз қаласындағы бірінші қазақ полкінің кіші командирлерін даярлайтын алты айлық курсқа жіберіліп, кейін сержант шенін алады.
Кіші командир болған Сәрсенбай Қаңтарбай "жаттығудан" кейін майдан шебіне түсіп, жерлестерімен бірге жауға қарсы соғысқан. Сәрсенбай Қаңтарбай әскери борышын өтеген екінші жылы Бауыржан Момышұлы басқарған атақты дивизияға ауыстырылды.
1943 жылы мамырда Сәрсенбай Қаңтарбай Түркіменстанның Мары қаласындағы пулеметшілер училищесіне оқуға жіберілді. Одан кейін 9-гвардиялық, 13-гвардиялық полктердің пулеметшілер ротасында командир болып қызмет етті. Польшаны, Литваны, Латвияны, Эстонияны азат етуге қатысты.
1944 жылдың қаңтарында германиялық Гумбин қаласы үшін болған шайқастарда ауыр жараланған кейіпкеріміз 1945 жылдың 24 маусымына дейін госпитальда болды.
"Бауыржан Момышұлы екеуміз бір күнде жараланғанбыз, – деп еске алады ақсақал, – есімде, қаңтардың жиырма біріншісі болатын. Момышұлы омыртқасынан жараланған. Біздің бөлімшеде сол ұрыста 12 пулеметші жараланды, олардың бірнешеуі ауыр хәлде еді. Бізді Владимир облысындағы Кальчугино қаласындағы госпитальға жіберді. Сол жерде мен фашистік Германияны жеңгенімізді білдім. Біраз уақыттан кейін Мәскеудегі Жеңіс шеруінің қатысушысы болдым".
Жауынгерлік ерлігі үшін Сәрсенбай Қаңтарбай 1-ші және 2-ші дәрежелі Ұлы Отан соғысы ордендерімен марапатталған, сонымен қатар Жетісу облысы Көксу ауданының Құрметті азаматы.
Бейбіт заманда Сәрсенбай Қаңтарбай мұғалім болып қызмет етті, ауыл балалары ұстазын қатты жақсы көретін. Кейіпкеріміз отбасылық өмірінде де табысқа жетті: бала өсірді, қазір жиырмадан астам немере сүйіп отыр, қазір шөберелерін де ықыласпен бағып отыр.
