Есірткі өндірумен және сатумен айналысқан ұйымдасқан қылмыстық топ құрықталды

ҚР ІІМ бүгін, 2024 жылғы 21 қарашада синтетикалық есірткі өндірген және өткізген ұйымдасқан қылмыстық топтың таратылғаны туралы мәлімдеді, деп хабарлайды Zakon.kz.

ІІМ есірткі қылмысына қарсы іс-қимыл комитеті төрағасының орынбасары Данияр Мейірханның айтуынша, ірі қалалар аумағында синтетикалық есірткілерді дайындап, оны өткізуге қатысы бар ұйымдасқан қылмыстық топ жойылды.

"Астана мен Алматыда жоспарлы іс-шаралардың нәтижесінде ұйымдасқан қылмыстық топтың 14 мүшесі ұсталды. Күдіктілер ұзақ уақыт бойы психотроптық заттарды сатумен, прекурсорлар мен зертханалық жабдықтарды жеткізумен, есірткі зертханаларын салу үшін объектілерді дайындаумен айналысқан",- деп мәлімдеді ресми өкіл.

Ұстау барысында үш есірткі зертханасы, екі интернет-есірткі дүкені жойылды, 1 тонна 750 литр химиялық компонент, оның ішінде өткізуге дайын 30 кг "мефедрон" және "альфа-pvp" есірткілері тәркіленді.

"Сотқа дейінгі тергеу жалғасуда",- деді Данияр Мейірхан.

Бұған дейін Ақтөбеде бір айда 6 ұрлық жасаған күдікті ұсталғаны хабарланған болатын.