Олжас Бектенов: 2024 жылы өңделген өнім экспорты 6,4% өсті
Сурет: primeminister.kz
Парламент Сенатының депутаты Сүйіндік Алдашев Премьер-Министрге үкіметтің әртараптандырылған экономиканы құру, құнды өндірістерді дамыту және шикізаттық емес экспортты ұлғайту жөніндегі жоспарларына қатысты сауалмен жүгінді.
Олжас Бектенов экономиканы әртараптандыру Үкіметтің басты міндеттерінің бірі екенін айтты.
"Мемлекет басшысы бұл мәселеге үнемі үлкен көңіл бөледі. Бұл бағытта үкімет пен мемлекеттік органдар белсенді жұмыс атқаруда және бүгінде нәтижелер бар. Статистикалық мәліметтерге сәйкес, өңдеу өнеркәсібі көлемі бойынша шикізат секторын басып озды. Өңдеу өнеркәсібінің үлесі 47 пайыз болса, шикізат секторының үлесі 45 пайызды құрайды. Бұл бағыттағы белсенді жұмысты жалғастыру қажет", — деді ол.
Қабылданған шаралардың бірі – шикізатқа экспортқа емес, ішкі нарыққа басымдық беру. Оның нәтижесі алюминий мен мысты отандық өңдеуді екі есеге арттыру болды. Бұл жақсы көрсеткіш.
Үкімет басшысы одан әрі экономиканы әртараптандыру саласында отандық тауар өндірушілерді мемлекеттік сатып алулар бойынша қолдау маңызды екенін айтты.
"Осы бағытта да қажетті шаралар жүргізілуде, біз тек отандық өндірушілерден сатып алынатын тауарлардың тізімін 1,5 мыңнан 4,5 мыңға дейін арттырдық. Бұл мемлекеттік органдар мен квазимемлекеттік компаниялар осы 4,5 мың тауар позициясына импорттық тауарларды сатып ала алмайды, тек отандық өндірушілерден сатып алады. Нәтижесінде отандық тауар өндірушілермен жасалған келісімшарттардың көлемі 55 пайызға өсіп, 350 млрд теңгеге жетті", — деді Бектенов.
Оның айтуынша, тағы бір маңызды қадам — отандық өндірушілермен өнімді жеткізу бойынша офтейк келісімшарттарын жасау.
"Үкімет пен "Самұрық-Қазына" қоры бұл бағытта белсенді жұмыс жүргізуде. Оффтейк-келісімшарттардың жалпы сомасы биыл 134 млрд теңгеге жетті. Бұл көрсеткіш өткен жылмен салыстырғанда 14 есеге жоғары", — деді Премьер-Министр.
Сонымен бірге, оның айтуынша, қазіргі таңда еліміздің барлық аймақтарында ауқымды индустриялық жобалар жүзеге асырылуда. Мәселен, Атырау облысында полипропилен шығаратын ірі зауыт ашылды. Оның жылдық өндірістік қуаты 1 миллион тонна полипропиленді құрайды.
"Егер Орталық Азия мен Оңтүстік Кавказдағы барлық мұнай-химия зауыттарымен салыстыратын болсақ, біздің Атыраудағы зауыттың қуаттылығы әлдеқайда жоғары, бұл өте үлкен және заманауи өндіріс орны", — деді Бектенов.
Қостанай қаласында Kia толық циклді автомобильдер шығаратын зауыт салуда. Кәсіпорын келесі жылы іске қосылады. Алматыда мультибрендті автомобиль зауыты ашылады. Саран қаласында автокөлік шиналарын шығаратын зауыт ашылды, ол да заманауи ірі өндіріс орны.
"Осындай өндіріс орындары әр өңірде бар. Бұл жобаларды жүзеге асыру біздің экономиканың құрылымын өзгертуге мүмкіндік береді. Биылғы жылы біз дайын өнім экспортының 6,4 пайызға артқанын көріп отырмыз. Дайын өнім 7,2 пайызға төмендеді, бұл бағытта үкімет пен мемлекеттік органдар белсенді жұмысты жалғастырады", — деді Олжас Бектенов.
Айта кетейік, жалпы отырыста Сенат депутаттары Ұлттық қордан 2025-2027 жылдарға арналған кепілдендірілген трансферт туралы заңды мақұлдады.
