Аяздың беті қайтпайды: Қазақстанда 11-13 ақпанға арналған ауа райы болжамы

Қазақстанның басым бөлігінде тұрақсыз ауа райы сақталады. Бұл туралы Zakon.kz тілшісіне "Қазгидромет" РМК ұсынған 2025 жылғы 11-13 ақпанға арналған ауа райы болжамында айтылады.

Синоптиктердің болжауынша, алдағы тәуліктерде республиканың солтүстік облыстарында ауа райы солтүстік циклонның шұңқырынан қалыптасады, ал оңтүстік облыстар оңтүстік циклонның ықпалында болады.

"Осыған байланысты күндіз еліміздің оңтүстігі мен оңтүстік-шығысында қар жауып, бұрқасын, ылғалды қар мен жаңбыр түріндегі аралас жауын-шашын, көктайғақ болады деп күтілуде. Республикада жел күшейіп, тұман түседі". "Қазгидромет" РМК

Болжам бойынша ауа температурасының басым болуы күтілуде:

• батыста түнде -5-13°C, күндіз -6°C +1°C;
• оңтүстік-батыста түнде -1-9°C, күндіз -3°C +2°C;
• солтүстік-батыста ең төменгі температура -10-18°С-тан -7-16°С-қа дейін жоғарылайды, ең жоғары температура -3-10°С шамасында болады;
• солтүстікте ауа температурасы түнде -7-20°С-тан -10-22°С-қа дейін ауытқиды, ал күндіз ауа температурасы -2-8°С-тан -5-11°С-қа дейін төмендейді;
• шығыста және орталықта -10-23°С-тан -7-18°С-қа дейін жоғарылау болжанады;
• оңтүстік облыстарда ауа температурасы -5-13°С-тан 0-10°С-қа дейін, күндіз -5°С +5°С-тан -1°С +7°С-қа дейін көтеріледі;
• оңтүстік-шығыста ауа температурасы түнде -5-25°С-тан -3-20°С-қа дейін көтеріледі, күндіз ауа температурасы -5°С-тан +5°С-қа дейін болады;
• таулы аймақтарда -6-11°С.