Спорт жаңалықтары 
Таразда тарихи қамал тозып барады
Сурет: Zakon.kz
Бірегей нысанның бір қабырғасы опырылып, қалған бөлігі қаусап тұр. Ал айналасында жеке тұрғын үйлер жапсарлас салынғандықтан тұрғындар үйіндісі үйімізге құлай ма, деп үрейленіп отыр.
XI ғасырда Ұлы Жібек жолы бойында саудагерлер аялдаған керуен сарайдың қазіргі қалпы осы. Қабырғасы құлап, бес метр биіктен топырағы төгіліп тұр, деп жазады qazaqstan.tv.
Көпшілік көне нысанның басқа бөлігі баспаналарына жақын тұрғандықтан бір күні басып қала ма, деп қорқады.
"Қазіргі жағдайда елге қауіпті болып тұр. Бұл құлағаны бірінші рет емес, алдында да құлаған. Су ағарларын да қате істеген. Одан кейін міне мына жерде халық өтеді. Тротуарды қарасаңыздар кішкентай ғана, мына жағы жол. Мына жерде апат болып құласа адамдар қайда қашады?" Қайрат Тәженов, қала тұрғыны
15 жыл бұрын қамалдың қабырғалары қайта жаңғыртылып, жұмысына 70 млн теңге жұмсалып, ашық аспан астындағы музейге айналған еді. Талап бойынша тарихи нысан әр бес жыл сайын жаңғыртудан өтуі тиіс. Сондықтан 2020 жылы 110 млн теңге қаралған. Бірақ әкімдік бөлінген қаржыны кері қайтарып алған.
"Жаңғырту жұмыстары жүргізілген жоқ. Мемлекеттің күтімі мен қарауынсыз қалған, елеусіз, ескерусіз қалған ескерткіш ол – мүгедек ескерткіш болып есептеледі, мүмкіндігі шектеулі ескерткіш болады. Міне дәл қазіргі ескерткіш дәл сондай күйде тұр." Сауран Қалиев, Тарихи-мәдени ескерткіштерді қорғау және қалпына келтіру дирекциясының директоры
Мәдениет басқармасы мамандары қамалды қалпына келтіру туралы дабыл қаққанымен нәтиже болмады. Ал былтыр тарихи бекініс Тараз әкімдігінің меншігіне өтті. Шаһар шенділері нысан 90%-ға тозып тұр, дейді.
"Сметалық құны 417 млн теңгені құрап отыр. Бұл биыл жылдың соңына дейін жабық тұрады. Себебі біз былтыр теңгерімге алғанда осы ғимараттың тозу деңгейін анықтаған болатынбыз." Нұрсұлтан Исабеков, қала әкімінің орынбасары
Қала әкімдігі қираған қамалды екі айдан кейін жаңғыртуға кіріспек. Реконструкциялық жұмыстар жыл аяғына дейін жалғасуы мүмкін.
