Көкшетауда 5 млн теңгеден астам алимент төлемеген ер адамға қатысты тергеу басталды

Көкшетауда 5 млн теңгеден астам алимент төлемеген ер адамға қатысты тергеу басталды, деп хабарлайды Zakon.kz polisia.kz-ке сілтеме жасап.

2 сәуірде Көкшетау полиция басқармасына елорда тұрғынынан өтініш түсті. Әйел Красный Яр ауылында тұратын бұрынғы жұбайы кәмелетке толмаған баланы асырау үшін алимент төлеу туралы сот шешімін орындамай отырғанын хабарлады. Бүгінгі таңда борышкердің алимент бойынша қарызы 5 миллион 327 мың теңге болған.

Ер адам алимент төлеуге қатысты бірнеше рет ескерту мен хабарлама алғанына қарамастан, соттың талаптарын орындаудан бас тартқан. Қарызды ерікті түрде өтеуге бағытталған барлық шаралар нәтиже бермеген.

Қазіргі уақытта борышкерге қатысты Қазақстан Республикасының Қылмыстық кодексінің 139-бабы — "Балаларды немесе еңбекке жарамсыз ата-аналарды асырауға қаражат төлемеу" бойынша сотқа дейінгі тергеу басталды.