Қазақстандағы некенің жартысы ажырасумен аяқталуда

Әділет министрі Ерлан Сәрсембаев 2025 жылғы 21 сәуірде Мәжілістегі Үкімет сағатында ажырасулар санының көп болуы алимент төлемдерінен жалтарумен қалай байланысты екенін айтып берді, деп хабарлайды Zakon.kz тілшісі.

Оның айтуынша, алименттік төлемдер өзектілігін сақтауда.

"Алимент төлемдері – кәмелетке толмағандардың құқықтарына тікелей қатысты, әлеуметтік маңызы жоғары істердің бірі. Олар 18 жасқа дейін орындалуы мүмкін. Жыл басында мәжбүрлеп орындауға жататын 283 мың құжат тіркелген, оның ішінде 12 мыңы немесе 4%-ы – проблемалық істер. Оларға қатысты орындауды қамтамасыз ету шаралары қабылдануда", – деді министр.

Министрдің айтуынша, алимент өндіру туралы атқарушылық құжаттарды орындаудағы басты мәселелер – тұрақты табыстың, мүліктің болмауы, кей жағдайларда табысты әдейі жасыру.

"Тұрақты табысы жоқ борышкерлермен жүйелі түрде жұмыс жүргізіліп, оларды жұмысқа орналастыру шаралары қабылдануда. Борышкерлерге қатысты соңғы шара ретінде әкімшілік және қылмыстық жауапкершілікке тарту қолданылады. Алайда бұл шаралар алимент төлемеуді түбегейлі шешпейді. Өз балаларына қамқорлық көрсетуден бас тарту, алимент төлемеуден жалтару – отбасы-некелік қатынастардағы дағдарыстың салдары", – деді Ерлан Сәрсембаев.

Оның айтуынша, бұл жағдайды ажырасулар бойынша жағымсыз статистика да көрсетіп отыр: өткен жылы 61 080 ажырасу тіркелген, ал сол кезеңде 124 774 неке қиылған. Яғни, ажырасу көрсеткіші некелер санының жартысына жуық.

"Бұл бағытта отбасы институтын нығайту және балалардың мүддесін қорғау бойынша жекелеген мемлекеттік органдар кешенді жұмыс жүргізуі тиіс. Мұндай істер Әділет министрлігінің ерекше бақылауында тұр", – деп қосты министр.

Бұған дейін Шымкентте мұғалімді бопсалаған блогердің ұсталғандығы жайлы жазған болатынбыз.